काठमाडौं— ललितपुर महानगरपालिका–१७ ग्वार्को स्थित एक टहरोमा आगलागीमा परी मृत्यु हुनेको संख्या चार पुगेको छ। दुई छोरी र आमापछि बुबाको पनि मृत्यु भएको प्रहरीले जनाएको छ। 

मोबिल भण्डार गरिएको टहरोमा  गत वैशाख २३ गते आगलागी  हुँदा सञ्जय गिरी परिवारका सदस्यहरू घाइते भएका थिए। शनिबार सञ्जयको समेत मृत्यु भएको जिल्ला प्रहरी परिसर ललितपुरका एसएसपी शेखर खनालले जानकारी दिए।

सञ्जयको ग्वार्कोस्थित किस्ट अस्पतालको भेन्टिलेटरमा उपचार भइरहेको थियो। 

सोही अस्पतालमा सञ्जयकी श्रीमती रूपाको गत वैशाख ३१ मा मृत्यु भएको थियो। आगलागी भएको भोलिपल्टै उनका दुई छोरी  ८ वर्षीया प्रिया र ३ वर्षीया एलिसाको मृत्यु भएको  थियो।

आगलागीमा परी घाइते भएका सञ्जयका भतिज १५ वर्षीय नित गिरीको उपचार जारी छ। उनको अवस्था सामान्य छ। उनलाई नर्मल वार्डमा सारिएको ललितपुर प्रहरीले जनाएको छ।