काठमाडौं— ललितपुर महानगरपालिका–१७ ग्वार्कोस्थित एक टहरोमा आगलागीमा परी घाइते भएका एक जनाको उपचारको क्रममा मृत्यु भएको छ। योसँगै उक्त घटनामा मृत्यु हुनेको संख्या तीन पुगेको छ। 

मोबिल स्टोर गरिएको टहरोमा गत वैशाख २३ गते आगलागी हुँदा सञ्जय गिरीको परिवारका पाँच सदस्य घाइते भएका थिए। उनीहरुलाई उद्धार गरि उपचारका लागि ग्वार्कोस्थित किस्ट अस्पताल लगिएको थियो।

भोलिपल्ट सञ्जयका छोरीहरु ८ वर्षीया प्रिया र ३ वर्षीया एलिसाको मृत्यु भएको थियो। पछिल्लोपटक सञ्जयकी श्रीमती ३२ वर्षीया रुपाको पनि उपचारको क्रममा मृत्यु भएको जिल्ला प्रहरी परिसर ललितपुरका प्रवक्ता एवम् एसपी नरेशराज सुवेदीले जानकारी दिए।

सञ्जयको भेन्टिलेटरमा उपचार भइरहेको छ । उनीहरुका भतिज १५ वर्षीय नितको पनि उपचार जारी छ।