काठमाडौं— अनलाइनमार्फत जुवा खेलाउने कार्यलाई प्रवर्द्धन गरेको आरोपमा  बिहीबार प्रहरीले कलाकारलाई पक्राउ गर्‍यो ।

 काठमाडौं उपत्यका अपराध अनुसन्धान कार्यालयको टोलीले बल्छी धुब्रे भनेर चिनिने मरिचमान श्रेष्ठ र राजु मास्टर भनेर चिनिने राजु पौडेललगायत ८ जनालाई पक्राउ गरेको छ । उनीहरु काठमाडौंका विभिन्न स्थानबाट पक्राउ परेका हुन् । बुधबार मात्र प्रहरीले अनलाइनमार्फत जुवा खेलाउने गिरोहका पाँच जना पक्राउ परेका थिए ।

विश्वभर सञ्चालन हुने विभिन्न खेल तथा अनलाइन गतिविधिमा सट्टेबाज (जुवा) खेल्न प्रयोग हुने ‘वान एक्स बेट’ मार्फत सट्टाबाजी लगाउन रकम संकलन गर्ने र क्रिप्टोकरेन्सीको कारोबार गर्ने पाँच जनालाई प्रहरीले काठमाडौंका विभिन्न ठाउँबाट पक्राउ गरी सार्वजनिक गरेको थियो ।

उनीहरूमध्ये एकै व्यक्तिले विभिन्न व्यक्तिका कागजात प्रयोग गरी ६३ वटा खाता खोलेर ६४ करोडको कारोबार गरेको खुलेको प्रहरीले जनाएको छ । प्रहरीका अनुसार यस घटनामा ७४ करोडभन्दा बढी कारोबार भएको देखिएको छ । 

अनलाइन बेटिङ प्रवर्द्धन गर्नेमा चर्चित सेलिब्रेटी
नेपालमा चर्चित मोडल, कलाकार तथा टिकटकर समेतले ‘वान एक्स बेट’मा सट्टेबाजी गर्न विज्ञापन गर्छन् ।

नायिका सुष्मा कार्की, मोडल विना राउत, अर्की मोडल तथा टिकटकर उषा उप्रेती, कोरियोग्राफर तथा मोडल, टिकटकर सरोज प्रजाले समेत ‘वान एक्स बेट’मा सट्टेबाजी गर्न विज्ञापन गर्छन्  । उनीहरुले टिकटक भिडिओ, बल्गमार्फत विज्ञापन गरेको देख्न सकिन्छ । त्यस्तै, युट्युबर एलिस राईसमेत सट्टेबाजीको प्रचारमा सक्रिय छन् ।