काठमाडौं— प्युठानमा सोमबार अपरान्ह भएको कार दुर्घटनामा परी मृत्यु भएका थप एक जनाको सनाखत भएको छ।

दाङको घोराही उपमहानगरपालिका वडा नम्बर १५ का ११ वर्षीय बालक शिशिर खनालको सनाखत भएको हो । यसअघि सात जना मृतकको सनाखत भएको थियो  । 

सोमबार पौने ४ बजे स्वर्गद्वारी नगरपालिका- ४ भिङ्ग्रीमा निजी कार दुर्घटनामा परेको थियो ।  उक्त दुर्घटनामा ज्यान गुमाउने सबै  दाङका हुन् ।

जिल्ला प्रहरी प्रमुख डीएसपी सुवास खड्काका अनुसार मृत्यु हुनेमा बालक शिशिरसहित तुलसीपुर उपमहानगरपालिका-m१५ कोठरीकी ३४ वर्षीया सरिता शर्मा, उनका १४ वर्षीय छोरा विशाल र ९ वर्षे विकास, गढवा गाउँपालिका- ७ का ४० वर्षीय गोविन्द शाह, उनकी ३० वर्षीया श्रीमती राधा नेपाली र छोरा ९ वर्षीय आदित्य र चालक लमही नगरपालिका- ५ का ४९ वर्षीय तारा कुमाल छन्।
डीएसपी खड्काका अनुसार शिशिर सरिताका साथीको छोरा हुन् । स्वर्गद्वारी मन्दिर दर्शन गरी दाङ फर्किदा लु १ च ६३४५ नम्बरको कार स्वर्गद्वारी नगरपालिका ४ भिंग्रीको घुम्तीमा दुर्घटनामा परेको थियो। दुर्घटनाको कारण खुलेको छैन ।