काठमाडौं— साफ च्याम्पियनसिपको २०२३ मा नेपाल कठिन समूहमा परेको छ । साबिक उपविजेता नेपालको समूहमा भारत र आमन्त्रित मुलुक कुवेत परेका छन् ।
बुधबार भारतमा आयोजित साफ च्याम्पियनसिप २०२३ को ड्र निकाल्ने क्रममा नेपाल समूह ‘ए’मा परेको छ ।
भारतको बेंगलोरमा आगामी असार ६ देखि १८ सम्म आयोजना हुने च्याम्पियनसिपमा नेपालको समूहमा साबिक विजेता भारत र आमन्त्रित कुवेतसँगै पाकिस्तान पनि छ । प्रतियोगिताको समूह ‘बी’मा लेबनानसँगै माल्दिभ्स, भुटान र बंगलादेश छन् । फिफाको प्रतिबन्धका कारण श्रीलंकाले च्याम्पियनसिपमा भाग लिएको छैन ।
च्याम्पियनसिपमा यसपटक कुवेत र लेबनानलाई आमन्त्रित विदेशी टोलीको रूपमा पहिलो पटक समावेश गरिएको छ ।
साफ मुलुकको फुटबल स्तरोन्नतिका लागि यस्तो थालनी गरिएको हो ।
यसअघि बंगलादेशमा आयोजित महिला फुटबलमा आमन्त्रित विदेशी टोलीको रूपमा रुसलाई सहभागी गराइएको थियो ।
