काठमाडौं— बलिउड फिल्म स्त्री-२ ले भारतीय बक्स अफिसमा ऐतिहासिक कमाइ गरेको छ।
रिलिजको पहिलो दिन बिहीबार स्त्री-२ ले ५५ करोड ४० लाख कमाइ गरेको फिल्म विश्लेषक तरण आदर्शले जानकारी दिएका छन्।
फिल्मले बुधबार पेड रिभ्युबाट ९.४० करोड कमाइ गरेको र बिहीबार ५५ करोड ४० लाख गरि कुल ६४ करोड ८० लाख कमाइ गरेको आदर्शले जानकारी दिएका हुन्।
योसँगै स्त्री-२ ले बलिवुडमा पहिलो दिन यसअघि पठानले ५५ करोड कमाएर राखेको किर्तिमान समेत तोडेको छ। पहिलो दिन पठान बाहेक एनिमलले ५४.७५ करोड कमाएको थियो भने केजीएफ-२ ले ५३.९५ करोड कमाएको थियो। त्यस्तै वारले ५१ करोड ६० लाख कमाएको थियो।
यसअघि बनेको स्त्रीले आफ्नो पहिलो सातामा ६० करोड ३९ लाख कमाइ गरेको थियो, जबकी स्त्री-२ ले पहिलो दिनमा नै सो अंकलाई पछाडि पारेको छ।
अमर कौशिकले निर्देशन गरेको स्त्री-२ मा श्रद्धा कपूर, राजकुमार राव, पङ्कज त्रिपाठी, अभिषेक बेनर्जीलगायतको अभिनय रहेको छ।
