काठमाडौं— एसीसी प्रिमियर कपमा सन्दीप लामिछानेले नट आउट ४२ रनको योगदान दिएपछि नेपालले कतारलाई १५८ रनको लक्ष्य दिएको छ ।
५८ बलमा ६ चौका प्रहार गरेका उनले ४२ रन जोडेका हुन् । नेपालले ४०.३ ओभरमा पूरै १० विकेट गुमाएर १५७ रन जोडेको हो ।
नेपालले एसीसी प्रिमियर कपमा कतारसामु कमजोर प्रदर्शन गर्यो ।
त्रिवि क्रिकेट मैदानमा टस हारेर ब्याटिङको निम्तो पाएको नेपाल कतारका बलरसामु खुल्न सकेनन् ।
नेपालका लागि कप्तान रोहित पौडेलले २७, आसिफ शेखले १९, दीपेन्द्रसिंह ऐरीले १२, सोमपाल कामी र आरिफ शेखले समान ११ रनको योगदान दिए । यस्तै, कुशल भुर्तेल २, भीम सार्की ६, कुशल मल्ल ३, गुल्सन झा ७ र ललित राजवंशी १ रनमा आउट भए ।
ओपनर कुशल भुर्तेल ८ बलमा २ रन बनाएर आउट भए । उनलाई गेयन मुनावीराको बलमा खुर्राम शहजादले क्याच आउट गराए ।
आशिफ शेखले २७ बलमा १९ रन जोडे । उनलाई इक्रामुल्लाह खानको बलमा मुहम्मद तनवीरले क्याच आउट गरे ।
नेपालका लागि कप्तान रोहित पौडेलले २७ रन बनाए । ३६ बलको सामना गरेका उनलाई ओवाइस् अहमेदको बलमा लियनागेले क्याच आउट गराए ।
कतारका लागि अमिर फारूकले चार, ओवेस अहमेदले समान तीन, गेयन मुनावीराले दुई तथा इक्रामुल्लाह खानले एक विकेट लिए ।
