काठमाडौं— अस्ट्रेलियालाई हराउँदै भारत आईसीसी टी२० विश्वकप क्रिकेटको सेमिफाइनलमा पुगेको छ। गएराति भएको खेलमा अस्ट्रेलियालाई २४ रनले हराउँदै भारत सेमिफाइनलमा प्रवेश गरेको हो।
भारतले दिएको २ सय ६ रनको लक्ष्य पछ्याएको अस्ट्रेलियाले निर्धारित २० ओभरमा ७ विकेट गुमाएर १ सय ८१ रन मात्र बनाउन सक्यो।
अस्ट्रेलियाका लागि ट्राभिस हेडले ७६, कप्तान मिचेल मार्शले ३७, ग्लेन म्याक्सवेलले २०, टिम डेभिडले १५ र प्याट कमिन्सले नटआउट ११ रन बनाए।
बलिङतर्फ भारतका अर्शदीप सिंहले ३, कुलदिप यादवले २ तथा जसप्रित बुमराह र अक्षर पटेलले समान १–१ विकेट लिए।
त्यसअघि टस हारेर पहिले ब्याटिङ गरेको भारतले निर्धारित २० ओभरमा ५ विकेट गुमाएर २ सय ५ रन बनाएको थियो।
भारतका लागि कप्तान रोहित शर्माले ९२, सूर्यकुमार यादवले ३१, शिवम् दुबेले २८, हार्दिक पाण्डेयले नटआउट २७ र रिषभ पन्तले १५ रन बनाए।
बलिङतर्फ अस्ट्रेलियाका मिचेल स्टार्क र मार्कस स्टोइनिसले समान २–२ तथा जोश हेजलवुडले १ विकेट लिए।
भारतले अब सेमिफाइनलमा इङ्ग्ल्याण्डसँग खेल्नेछ। अस्ट्रेलिया भने बाहिरिने सम्भावना बलियो बनेको छ।
आज बिहान हुने अफगानिस्तान र बङ्गलादेशबीचको खेलले अस्ट्रेलियाको भाग्य निर्धारण गर्ने छ। अफगानिस्तानले जिते अस्ट्रेलिया बाहिरिनेछ। सुपर एटको अन्तिम खेलमा आज बिहान यी दुई टोलीबीच खेल हुनेछ।
