![हत्या आरोपमा कन्नड अभिनेता दर्शन र अभिनेत्री पवित्रा पक्राउ](https://newsgriha.com/uploads/posts/655-1718196898.jpg)
काठमाडौं— चर्चित कन्नड अभिनेता दर्शन थुगुडेपा र पवित्रा गोडालाई पक्राउ परेका छन्। फार्मेसी कम्पनीमा कार्यरत रेणुका स्वामीको हत्या गरेको अभियोगमा उनीहरु पक्राउ परेका हुन्। प्रहरीले नियन्त्रणमा लिएर सोधपुछ सुरु गरेको छ।
अभिनेता दर्शन थुगुडेपाविरुद्ध कामाक्षीपल्या प्रहरी स्टेसनमा जुन ९ मा उजुरी परेको थियो। उनलाई बैंगलोरको मैसूरको फार्म हाउसबाट पक्राउ गरेको हो। प्रहरीका अनुसार बैंगलोरको चित्तदुर्ग क्षेत्रमा बस्ने रेणुका स्वामी नामक व्यक्तिको हत्यामा अभिनेता दर्शन र अभिनेत्री पवित्राको नाम आएको छ।
स्वामीको शव आइतबार कामाक्षीपल्या नजिकैको नालीमा फेला परेको थियो। यस वर्षको जनवरीमा पवित्रा गौडाले आफ्नो र दर्शनको सम्बन्धलाई १० वर्ष पूरा भएको सामाजिक सञ्जाल पोस्टमार्फत बताएकी थिइन्।
४७ वर्षीय अभिनेता दर्शन कन्नड सिनेमाको एक चर्चित अनुहार हुन्। उनी कारिया, कालासिपल्या, गजा, नवग्रह, सारथी, बुलबुल, यजमान, रोबर्ट, कटेरा जस्ता कन्नड भाषाका सुपरहिट फिल्महरूको हिस्सा भइसकेका छन्। उनले ९ पटक उत्कृष्ट अभिनेताको अवार्ड पाएका छन् ।