काठमाडौं— नेदरल्याण्ड्सलाई आगामी युरोकपमा ठुलो धक्का लागेको छ। बार्सिलोनाबाट खेल्ने सेन्टर मिडफिल्डर फ्रेन्की डी जोङ इन्जुरीका कारण युरोकप खेल्न नसक्ने भएपछि नेदरल्याण्ड्सलाई ठुलो धक्का लागेको हो। 

गत अप्रिल २१ मा रियल म्याड्रिडसँग बार्सिलोनाको ३-२ ले पराजित हुँदा २७ वर्षीय डी जोङ आफ्नो दाहिने खुट्टामा चोट लागेपछि मैदान बाहिर रहेका छन्। त्यसको बावजुद, मिडफिल्डरलाई जर्मनीमा युरोका लागि रोनाल्ड कोम्यानको २६ सदस्यीय टोलीमा नाम दिइएको थियो तर अब उनी युरोकपबाट बाहिरिएका छन्। 

डी जोङले युरोकपबाट बाहिरिएको पुष्टि गर्दै भनेका छन्, 'म दुखी र निराश छु कि म युरोमा पुग्न सक्दिनँ, हामीले पछिल्ला केही हप्ताहरूमा धेरै काम गरिरहेका छौं, तर दुर्भाग्यवश मेरो खुट्टा ठिक हुने थप समय चाहिने भएको छ। मुख्य प्रतियोगितामा देशको प्रतिनिधित्व गर्न पाउनु सपना र सबैभन्दा ठूलो सम्मान हो, तर अब, सम्पूर्ण राष्ट्र जस्तै, म पनि हाम्रो टोलीलाई बाहिरबाट उत्साहित गर्नेछु।'

डी जोङले नेदरल्याण्ड्सको लागि अहिलेसम्म ५४ खेल खेलेका छन् र दुई गोल पनि गरेका छन्। 

जुन १४ देखि शुरु हुने युरोकपमा नेदरल्याण्ड्स समुह डी मा रहेको छ। यस समुहमा नेदरल्याण्ड्ससहित पोल्याण्ड, फ्रान्स र अस्ट्रिया रहेका छन्। नेदरल्याण्ड्सले युरोकपमा पहिलो खेल पोल्याण्डसँग जुन १६ मा खेल्दै छ।