काठमाडौं— आईसीसी टी२० विश्वकप वार्मअप पहिलो खेलमा नेपाल क्यानडासँग ६३ रनले पराजित भएको छ। १८४ रनको लक्ष्य पछ्याएको नेपाल १९.३ ओभरमा १२० रनमा अल आउट भयो। नेपालका कुशल मल्लले ३० बलमा २ चौका र २ छक्कासहित सर्वाधिक ३७ रन बनाए।
दुवै ओपनर आसिफ शेख र कुशल भुर्तेलले सुरुवात देखिनै संघर्ष गरेका थिए। कुशलले १६ बलमा २ चौकासहित १० रन जोडे।
त्यसपछि अनिल साहले १६ बलमा २ चौका र १ छक्कासहित २४ रन जोड्दै आउट भए। कप्तान रोहित पौडेल टप एज लागेर विकेटकिपर बाट १ रनमा क्याच आउट भए। त्यसअघि आसिफ शेख २२ रनमा एलबीडब्लू धरापमा परे। उनले २२ बलमा ३ चौका प्रहार गरे।
सन्दीप जोरा ६, गुलसन झा डक र सोमपाल कामी ४ रनमा आउट हुँदा नेपालको हार पक्का बनेको थियो। त्यसअघि ग्रान्ड पेरी स्टेडियम डालासमा टस हारेर पहिला ब्याटिङको निम्तो पाएको क्यानडाले निर्धारित २० ओभरमा ७ विकेट गुमाउँदै १८३ रन बनाएको थियो।
अन्तिम ओभरमा करण केसीलाई २१ रन प्रहार गर्दै क्यानडाले मुमेन्ट्स आफ्नो पक्षमा लैजानुको साथै बलरलाई राम्रो योगफल दिएको थियो।
