काठमाडौं— सन्दीप लामिछानेले विश्व कीर्तिमान कायम गरेको खेलमा नेपालले ओमनमाथि ८४ रनको जित हात पारेको छ ।
एसीसी प्रिमियर कप अन्तरगत त्रिवि क्रिकेट मैदानमा शुक्रबार टस हारेर पहिले ब्याटिङ गरेको नेपालले ओमनसामु ३११ रनको चुनौती पेस गरेको थियो ।
जवाफी ब्याटिङ गरेको ओमनले ४६.३ ओभरमा ९ विकेट गुमाएर २२६ रन बनायो । अन्तिम ब्याटमेन घाइते भएर क्रिजमा आउन नसकेपछि नेपालले ८४ रनले जितेको हो ।
नेपालका लागि करण केसी र सन्दीप लामिछानेले समान तीन, दीपेन्द्रसिंह ऐरीले दुई र ललित राजंवशीले एक विकेट लिए ।
आजको खेलबाट बलर सन्दीप लामिछानेले ओडीआईमा सबैभन्दा कम खेलमा १०० विकेट लिने खेलाडीको कीर्तिमान बनाएका छन् । उनले ४२ खेल खेलेर सो कीर्तिमान बनाएका हुन् ।
आजको प्लेयर अफ द म्याच नेपालका कुशल मल्ल बने । उनले ६४ बलमा १०८ रन बनाएका थिए ।
टस हारेर पहिले ब्याटिङ गरेको नेपालले निर्धारित ५० ओभरमा ८ विकेट गुमाएर ३ सय १० रन बनाएको हो । नेपालका लागि अलराउन्डर कुशल मल्लले ६४ बलमा ९ चौका र १० छक्काको सहयोगमा १ सय ८ रनको शतकीय इनिङ खेले । उनले ५९ बलमा पहिलो शतक पूरा गरेका थिए ।
यस्तै, सोमपाल कामीले ४८ बलमा ६३ रनको अविजित अर्धशतकीय इनिङ खेले । सोमपाल कामीले ४९ बलमा ७ चौकाको सहयोगमा अर्धशतक बनाएका थिए । करण केसीले १५ बलमा २९ रन बनाउँदै अविजित रहे ।
