काठमाडौं— अनमोल केसी र जसिता गुरुङ स्टारर फिल्म फर्की फर्कीको 'अन्तिम माया' बोलको गीत सार्वजनिक भएको छ।

नरेन लिम्बूको करिब एक दशक अगाडिको 'हिट नम्बर'लाई पुनः रेकर्ड गरि फर्की फर्की टिमले यो गीतलाई फिल्ममा समावेश गरेको हो। पछिल्लोपटक रेकर्ड भएको गीतलाई नरेनले नै गाएका छन्।

सार्वजनिक गीतको भिडिओमा फिल्मका मूख्य अभिनेता अनमोल केसी र अभिनेत्री जसिता खड्का 'फिचर्ड' छन्। कुनै बेला युवापुस्तामाझ सर्वाधिक हिट रहेको गीतलाई पुनः रेकर्ड गरेर फिल्ममा समावेश गर्दा पछिल्लो पुस्ताले पनि यो गीतलाई रुचाउनेमा फिल्मको निर्माण यूनिट आशावादी देखिएको छ।

फिल्मको 'सिचुएशन'सँग मिल्दो भएका कारण यो गीतलाई फिल्ममा समावेश गरेको फिल्म निर्माण कम्पनी रोहित अधिकारी फिल्म्सले जनाएको छ।

सार्वजनिक गीतको भिडिओमा अनमोल र जसिताबीचको सम्बन्ध र प्रेममा आएको दरारलाई देखाउन खोजिएको छ।

फर्की फर्कीको पछिल्लो सार्वजनिक गीत अन्तिम मायालाई नरेन लिम्बूले नै लेख्नुका साथै कम्पोज गरेका हुन्। ट्रेलर र गीतहरुमार्फत दर्शकमाझ हाइप बनाएको फिल्म फर्की फर्की आगामी जेठ १० गतेदेखि देशव्यापी प्रदर्शन हुँदैछ।