काठमाडौं— सनराइजर्स हैदराबादले इन्डियन प्रिमियर लिग (आईपीएल) को जारी संस्करणमा सर्वाधिक रन बनाउने आफ्नै रेकर्डलाई सुधारेको छ। 

गत मार्च २७ मा मुम्बई इन्डियन्सविरुद्ध २ सय ७७ रन बनाएको हैदराबादले सोमबार रोयल च्यालेन्जर्स बेंगलुरु (आरसीबी)विरुद्ध २ सय ८७ रन बनाउन सफल भयो। यो संस्करण अघि आरसीबीले सन् २०१३ मा बनाएको २ सय ६२ रनको कीर्तिमान १० वर्षसम्म कायम रहेको थियो। तर सो किर्तिमान यो संस्करणमा तीन पटक तोडिएको छ। 

हैदराबादले २ पटक कीर्तिमान बनाउनु बाहेक यो सिजन कोलकता नाइट राइडर्सले दिल्ली क्यापिटल्सविरुद्ध २ सय ७२ रन बनाएको थियो। र, गएराति भएको खेलमा हैदरबादले आरसीबीलाई २० रन ले पराजित गर्‍यो। चेन्नस्वामी क्रिकेट स्टेडियममा टस हारेर ब्याटिङ गरेको हैदराबादले २० ओभरमा ३ विकेट मात्र गुमाएर २८७ रन बनायो।

हैदराबादका लागि ट्राभिस हेडले शतक प्रहार गरेका थिए। ३९ बलमा शतक पुरा गरेका उनी ४१ बलमा ९ चौका र ८ छक्का सहित १ सय २ रन बनाएर आउट भए।

यस्तै हेनरिक क्लासेनले २ चौका र ७ छक्का सहित ३१ बलमा ६७ रन बनाए। अब्दुल समादले १० बलमा ४ चौका र ३ छक्का प्रहार गर्दै ३७ रन बनाए। अभिषेक शर्माले ३४ तथा एइड्न मार्क्रमले ३२ रन जोडे।

आरसीबीका लागि लोकी फर्गुसनले २ तथा रिस टोप्ली १ विकेट लिए। जवाफमा आरसीबीले ७ विकेट गुमाउँदै २ सय ६२ रन मात्र  बनाउन सक्यो। आरसीबीका लागि दिनेश कार्तिकले ३५ बलमा ५ चौका र ७ छक्का सहित ८३ रन बनाए पनि जित निकाल्न सकेनन्। 

कप्तान फ्याफ डु प्लेसिसले २८ बलमा ७ चौका र ४ छक्का सहित ६२ रन बनाए। विराट कोहलीले २० बलमा ४२ बनाए। अनुज रावतले २५ जोड्दा महिपाल लोम्रोरले १९ रन जोडे । जित पछि हैदराबाद ६ खेलमा ४ खेल जित्दै चौथो स्थानमा छ। आरसीबी भने ७ खेलमा १ जित सहित पुछारमा यथावत छ।

आईपीएलमा आज  कोलकाता नाइट राइडर्स र राजस्थान रोयल्स भिड्ने छन्।