काठमाडौं— बलिउडका प्रभावशाली अभिनेता नवाजुद्दिन सिद्दीकी र उनकी पत्नी आलियाको सम्बन्ध चार वर्षयता चर्चाको विषय बनेको छ।

सन् २०२० मा दुवै बीचको सम्बन्धमा खटपट भएको खबर बाहिर आएको थियो । यसपछि उनीहरूबीचको द्वन्द्व निकै समयसम्म चल्यो। उनीहरूले आपसी विवाद लिएर अदालतसम्म पुगे।

यही बीचमा आलियाले सामाजिक सञ्जालमा नवाजुद्दिनको परिवारलाई लिएर विभिन्न खुलासा गरिन्। उनले नवाजुद्दिनविरुद्ध सम्बन्धविच्छेदको मुद्दा पनि दर्ता गराएकी थिइन्। उनी आफ्ना सन्तानसँग अलग्गै बस्थिन्। अब भने यो जोडी पुनः एकै ठाउँमा आएको छ।

हालै आलियाले विवाहको १४ औं वर्षगाँठ मनाउँदै एउटा पारिवारिक भिडियो सामाजिक सञ्जालमा राखेकी थिइन्। यो भिडिओ हेरेका धेरैले उनीहरूबीच झगडा साम्य भएको होला भन्ने अनुमान गरेका थिए।

आलियाले एक अन्तरवार्तामा आफ्नो जीवनमा धेरै कुराको बदलाव आएको बताउँदै नवाजुद्दिनसँगको सम्बन्धमा सुधार भएको जनाउ दिएकी छन्।

‘यो दिनमा मेरो जीवनमा धेरै बदलाव भएको छ । मलाई लाग्छ कि मैले विश्वका साथ खराब कुरामात्र शेयर गरेँ । राम्रो कुरा शेयर गर्न चाहिनँ । मलाई लाग्छ कि जुन राम्रो कुरा हो, त्यो पनि हेर्न पाउनुपर्छ,’ उनले भनेकी छन् ।
उनले अगाडि भनेकी छन्, ‘मलाई लाग्छ कि हाम्रो सम्बन्धमा जुन समस्या आए, त्यो जहिल्यै कुनै तेस्रो पक्षका कारणले भयो । तर अब त्यो गलत बुझाई हाम्रो जीवनबाट हटिसकेको छ । हामीले आफ्नो सन्तानको कारण आत्मसमर्पण गरिसक्यौँ। अब जिन्दगीमा अलग रहनुको कुनै विकल्प छैन। त्यसकारण हामी अब एकापसमा नलड्ने र शान्तिका साथ बस्ने निर्णय लिएका छौं।’

नवाजुद्दिन र आलियाले निकै लामो समयसम्म डेट गरेका थिए। नवाजुद्दिनसँग विवाह गर्नुअघि आलियाको नाम अञ्जली थियो। सन् २००९ मा विवाह गरेका यो जोडीको दुई सन्तान छन्।