काठमाडौं— पछिल्लो समय उत्कृष्ट प्रदर्शन गरिरहेको नेपाली राष्ट्रिय क्रिकेट टोलीले आज बिहीबार आईसिसी क्रिकेट विश्वकप लिग–२ को अन्तिम खेलमा युनाइटेड अरब इमिरेट्स (यूएई) सँग प्रतिस्पर्धा गर्दैछ । कीर्तिपुरस्थित त्रिवि क्रिकेट मैदानमा यूएईविरुद्ध प्रतिस्पर्धा गर्दा नेपाललाई जित्नैपर्ने दबाव छ ।
यूएईलाई जित्नैपर्ने दबाव किन छ भने आईसिसी क्रिकेट विश्वकप लिग–२ का शीर्ष तीन टिमले मात्र जिम्बाब्वेमा आगामी जुन १८ देखि जुलाई ९ सम्म हुने एकदिवसीय विश्वकप–२०२३ को छनोट प्रतियोगीतामा स्थान बनाउनेछन् ।
बाँकी चार टिमले नामिबियामा मार्च २४ देखि अप्रिल ४ सम्म हुने आईसिसी क्रिकेट विश्वकप क्वालिफायर प्लेअफ खेल्नेछन् । नेपाल अहिले ३५ खेलबाट ३८ अंक जोडेर चौथो स्थानमा छ । त्यो तेस्रो स्थानको नामिबियाभन्दा एक अंकले पछाडि हो ।
आज यूएईलाई पराजित गरे नेपालको ४० अंक हुनेछ । तेस्रो स्थानमा रहेर जिम्बाब्वेको टिकट पक्का गर्नेछ । अन्यथा, नेपाल प्लेअफबाट गुज्रिनुपर्नेछ । यदि नेपालले अंक बाँडे पनि नेपालका सम्भावना हुने छैन ।
अंक बाँडे नामिबिया र नेपालको समान ३९ अंक हुनेछ । पछिल्लो समय नेपाल उच्च लयमा छ । नेपालले ११ मध्ये १० खेलमा विजय हासिल गरेको छ । जसका कारण छैटौँ स्थानमा रहेको नेपाल एक खेल बाँकी हुँदा चौथो स्थानमा उक्लिएको छ ।
