काठमाडौं— अभिनेता, निर्देशक, कोरियोग्राफर तथा गीतकार एकिन्द्र साराशंकरले राष्ट्रिय लोक तथा दोहोरी गीत अवार्ड २०८० अन्तर्गत उत्कृष्ट भिडिओ निर्देशकको अवार्ड प्राप्त गरेका छन् ।
राष्ट्रिय लोक तथा दोहोरी गीत प्रतिष्ठान उपत्यका कमिटिको आयोजनामा भएको अवार्ड कार्यक्रममा साराशंकरले सो अवार्ड प्राप्त गरेका हुन् ।
करिब डेढ दशक यता लोक तथा दोहोरी गीत क्षेत्रमा म्युजिक भिडिओ निर्देशकको रुपमा कार्यरत साराशंकरलाई जुरीले उत्कृष्ट निर्देशकमध्ये उत्कृष्ट ५ भित्र छनौट गरेको थियो ।
उत्कृष्ट मध्येबाट साराशंकर सर्वोत्कृष्ट निर्देशकको रुपमा छानिएका हुन् । कानुनमन्त्री धनराज गुरुङ, प्रतिष्ठानका केन्द्रीय अध्यक्ष रिता थापामगर र प्रतिष्ठानकै उपत्यका कमिटिका अध्यक्ष अर्जुन थापाद्वारा हस्ताक्षरित विशेष प्रमाणपत्रसहित उनलाई कार्यक्रममा अवार्ड प्रदान गरिएको थियो ।
‘यो मेरो लामो समयको तपस्या र मेहनतको प्रतिफलको रुपमा मैले लिएको छु । प्रतिष्ठानले जुन हिसाबले अवार्डको लागि मलाई योग्य ठान्यो, त्यो मेरो लागि सबैभन्दा ठूलो उपलब्धि हो,’अवार्ड प्राप्त गरिसकेपछि साराशंकरले भने, ‘अवार्डले मेरो आगामी भिडिओमा अझै बढि मेहनत गर्ने हौसला दिएको छ । म मा अझै ठूलो जिम्मेवारी थपिएको महसुस गराएको छ अवार्डले ।’
बाग्लुङ तमानखोला गाउँपालिका बोंगादोभानका साराशंकर दुई दशकयता काठमाडौंमा रहँदै आएका छन् । लोकदोहोरी गीतका म्युजिक भिडिओ निर्देशन सँगै साराशंकर आफैं अभिनेताको रुपमा समेत चर्चित छन् । साथै उनी गीतकारको रुपमा पनि चर्चा कमाइसकेका छन् ।
पछिल्लो पटक मात्रै साराशंकरले पशुपति शर्मा र शान्ति श्री परियारको आवाजमा आफ्नो गीत ‘हाई सञ्चै’ बजारमा ल्याएका थिए । सो गीतको भिडिओमा उनी आफैंले अभिनय गर्नुका साथै निर्देशन समेत गरेका थिए ।
