काठमाडौं— सरकारले आफ्ना श्रीमानको हत्यारा योगराज ढकाल रिगललाई संविधान दिनवसको अवसरमा आममाफी दिएको विरोधमा भारती मानन्धरले काठमाडौंको माइतीघर मण्डलामा अनशन सुरु गरेकी छिन् ।
भारतीले श्रीमान् चेतन मानन्धरको हत्या अभियोगमा जेल परेका रिगललाई आममाफी दिएको भन्दै अनशन सुरु गरेकी हुन् । गत असोज ३ गते सरकारको सिफारिसमा राष्ट्रपति रामचन्द्र पौडेलले रिगललाई आममाफी दिएका थिए ।
श्रीमानको हत्या गर्नेलाई पुनः जेलमा पठाउनुपर्ने भारतीको माग छ । आठ वर्ष भइसक्दा पनि अझै उक्त घटनाबाट बाहिर निस्कन नसकेको अवस्थामा आममाफीले झनै पीडा दिएको उनले बताइन् ।
रिगल उक्त घटना हुँदाका बखत नेपाली कांग्रेसको युवा संगठन तरुण दलमा आबद्ध थिए । हत्या अभियोगमा उनलाई जिल्ला अदालत बाँकेका तत्कालीन न्यायाधीश विष्णु सुवेदीको इजलासले २०७६ साल वैशाखमा दोषी ठहर गर्दै सर्वस्वसहित जन्मकैदको सजाय सुनाएको थियो ।
