काठमाडौं— पाकिस्तानको इस्लामावादमा १६ औं संस्करणको एसिया कपको उद्घाटन समारोहमा नेपाली चिकित्सक तथा गायिका त्रिशला गुरुङले सांगीतिक प्रस्तुति दिने भएकी छन् ।
नेपाली समयअनुसार दिउँसो ३ः१५ बजे क्रिकेटको विश्व नम्बर १ पाकिस्तान र नेपाली टोलीले मुल्तान क्रिकेट स्टेडियममा पहिलो खेल खेल्दै छन ।
उद्घाटन समारोह मुल्तान क्रिकेट पौने ३ बजेबाट सुरु हुने बताइएको छ । खेल सवा ३ बजे सुरु हुनेछ । उद्घाटन खेलअघि मुल्तान क्रिकेट स्टेडियममा भव्य सांगीतिक कार्यक्रम हुँदैछ ।
नेपाली गायिका त्रिशला गुरुङले ३५ हजार दर्शक अट्ने स्टेडियममा बुधबार प्रस्तुति दिने छिन् । उनले पाकिस्तानी गायिका ऐमा बेगसँग प्रस्तुति दिने पाकिस्तान क्रिकेट बोर्डले जनाएको छ ।
त्रिशलासँगै सांगीतिक प्रस्तुति दिने बेग पाकिस्तानकी चर्चित नयाँ पुस्ताकी गायिका हुन् । यद्यपि, त्रिशलाले प्रस्तुति दिने गीतको प्रत्यक्ष प्रसारणबारे हुने नहुने भने अन्योल छ ।
गायिका त्रिशलाले अन्तर्राष्ट्रिय प्रसारण नीतिका कारण नेपाली गीत गाएको प्रत्यक्ष प्रसारण हुन नसक्ने जानकारी आफ्नो सामाजिक सञ्जाल फेसबुकमार्फत गराइसकेकी छन् ।
एसिया कपमा ६ टोलीको सहभागिता छ । जसमा नेपाल, भारत, पाकिस्तान, बंगलादेश, अफगानिस्तान र श्रीलंका छन् । प्रतियोगिताको प्रत्यक्ष प्रसारण स्टार स्पोर्ट्सले गर्नेछ ।
