काठमाडौं— गृहमन्त्रालयले महत्त्वपूर्ण स्थानका प्रहरी प्रमुखको जिम्मेवारी हेरफेर गरेको छ ।
गृहले सोमबार चारजना एसएसपीको सरुवा गरेको हो । प्रहरी महानिरीक्षकको सचिवालयमा कार्यरत वरिष्ठ प्रहरी उपरीक्षक (एसएसपी) भूपेन्द्र खत्रीको जिल्ला प्रहरी परिसर काठमाडौंमा सरुवा भएको छ ।
त्यस्तै सुरक्षा परिषद् सचिवालयमा रहेका सोमेन्द्रसिंह राठोरलाई काठमाडौं उपत्यका अपराध अनुसन्धान कार्यालयमा सरुवा गरिएको छ । काठमाडौं परिसर प्रमुख दानबहादुर कार्कीलाई प्रहरी महानिरीक्षकको सचिवालयमा सरुवा गरिएको छ भने अपराध अनुसन्धान कार्यालयका एसएसपी मनोज केसीलाई हेडक्वार्टर तानिएको छ ।
एसएसपी कार्की र केसीले नक्कली भुटानी शरणार्थी प्रकरणको अनुसन्धानको नेतृत्व गरिरहेका अधिकृत हुन् । यसअघि सरकारले काठमाडौं उपत्यका प्रहरी कार्यालय रानीपोखरीमा कार्यरत अतिरिक्त महानिरीक्षक (एआईजी) श्यामलाल ज्ञवालीको सरुवा गरेको थियो ।
प्रहरी नियमावलीमा प्रहरी वरिष्ठ उपरीक्षक (एसएसपी) र प्रहरी नायब महानिरीक्षक (डीआईजी) को सरुवा गृहमन्त्रीस्तरीय निर्णयले हुने ब्यवस्था छ ।
शरणार्थी प्रकरणको अनुसन्धानमा खटिएका प्रहरी वरिष्ठ अधिकृतहरूलाई हटाउन सत्तारुढ नेपाली कांग्रेस सभापति शेरबहादुर देउवाको दबाब थियो ।
