राष्ट्रिय क्रिकेट टिमका पूर्वकप्तान तथा  स्पिनर सन्दीप लामिछानेलाई टी–२० विश्वकप खेल्न जान अमेरिकाले भिसा नदिएपछि उनका समर्थकहरुले विरोध प्रदर्शन गरेका छन्। 

बुधबार काठमाडौंको माइतीघर मण्डलामा भेला भएर सन्दीपका समर्थकहरुले नेपालस्थित अमेरिकी दूतावासलाई दबाब दिन विरोध प्रदर्शन गरेका हुन्।   

लामिछानेलाई भिसा नदिए नेपालस्थित अमेरिकी राजदूतावासमा धर्ना बस्ने समेत उनीहरुको चेतावनी थियो। 

उनीहरुले लामिछानेलाई टी–२० विश्वकपकपबाट बञ्चित गराउने सडयन्त्र भइरहेको उल्लेख गर्दै उनलाई अमेरिका पठाउन सरकारीस्तरबाट पहल हुनुपर्ने मागसहित प्रदर्शन गरेका हुन्। 

सन्दीप भिसाका कारण अमेरिका उड्न नसकेपनि नेपाल क्रिकेट संघ (क्यान)का पदाधिकारी परिवारसहित आज अमेरिकातर्फ प्रस्थान गरेका छन्।