काठमाडौं— प्रधानमन्त्री पुष्पकमल दाहाल प्रचण्डकी पत्नी सीता दाहालको आजै अन्त्येष्टि गरिँदै छ । उनको दिउँसो २ बजे पशुपति आर्याघाटमा अन्तिम संस्कार गरिनेछ । अन्तिम श्रद्धाञ्जलीका लागि सीता दाहालको पार्थिव शरीरलाई माओवादी केन्द्रको केन्द्रीय कार्यालय पेरिस डाँडामा राखिएको छ । 

प्रधानमन्त्री पत्नी सीता दाहाललाई श्रद्धाञ्जली दिन विभिन्न दलका शीर्ष नेताहरू थापाथलीस्थित नर्भिक अन्तराष्ट्रिय अस्पताल पुगेका थिए । 

पूर्वप्रधानमन्त्री एवं नेपाली कांग्रेसका सभापति शेरबहादुर देउवा, पूर्वप्रधानमन्त्री एवं नेकपा एकीकृत समाजवादीका अध्यक्ष माधवकुमार नेपाल, पूर्वप्रधानमन्त्री बाबुराम भट्टराईलगायत नेताहरू दाहाललाई श्रद्धाञ्जली दिनका लागि अस्पताल पुगेका हुन् । 

दाहालको आज बिहान ८ः३३ बजे उपचारका क्रममा निधन भएको थियो । ६९ वर्षीया दाहाल लामो समयदेखि पार्किन्सनलगायत रोगबाट ग्रसित थिइन् ।