News Griha :: न्यूजगृह
गृह सचिव र प्रहरी महानिरीक्षकबीच कार्य सम्पादन सम्झौतामा हस्ताक्षर

काठमाडौं— गृह सचिव दिनेश भट्टराई र प्रहरी महानिरीक्षक बसन्त बहादुर कुँवरबीच कार्य सम्पादन सम्झौतामा हस्ताक्षर सम्पन्न भएको छ । 

गृह मन्त्रालयमा शुक्रबार आयोजित समारोहमा गृह सचिव दिनेश भट्टराई र प्रहरी महानिरीक्षक बसन्त बहादुर कुँवरले कार्य सम्पादन सम्झौतामा हस्ताक्षर गर्नुको साथै उक्त सम्झौता आदान प्रदान समेत गरेका हुन् ।

उक्त अवसरमा गृह सचिव भट्टराईले कार्य सम्पादन सम्झौताका विषयहरू समग्रमा शान्ति सुरक्षा, सेवा प्रवाह, विकास निर्माण र सुशासन लगायत गृहमन्त्रालयका सम्पूर्ण जिम्मेवारीहरू प्रतिबिम्बित गरेको उल्लेख गरे ।

सम्झौता कार्यान्वयन गर्ने क्रममा गृह मन्त्रालयको नेतृत्वको तर्फबाट हुने सहजीकरण, नीतिगत मार्ग निर्देशनका साथै आवश्यक पर्ने स्रोत साधनको परिचालनमा समेत मन्त्रालयको साथ सहयोग र उच्च स्तरको समन्वय हुने उनले उल्लेख गरे ।

सम्झौतामा उल्लेख भएका विषयहरू र सम्पादन गर्नु पर्ने कार्यहरू उचित तरिकाले सम्पादन गर्नेतर्फ सबैको आआफ्नो प्रयास, चिन्तन, क्रियाशीलता एवम् लगन उच्च हुने विश्वास उनले व्यक्त गरे ।

नेपाल सरकार गृह मन्त्रालयको कार्य क्षेत्र बमोजिमको कार्य सम्पादन गर्न सुशासन (व्यवस्थापन तथा सञ्चालन) ऐन, २०६४ को दफा १९ तथा सुशासन (व्यवस्थापन तथा संचालन) नियमावली, २०६५ को नियम ११ बमोजिम गृह सचिव भट्टराई र प्रहरी महानिरीक्षक कुँवरबीच उक्त सम्झौता भएको हो । 

प्रकाशित मिति: शुक्रबार, साउन १९, २०८०  १६:१६
Weather Update