काठमाडौं— धनुषाको मुखियापट्टी मुसहरनिया गाउँपालिकाको बेल्ही बस्तीभन्दा करिब ५० मिटर उत्तर पूर्वको सडकमा एक जना महिलाको गएराति अज्ञात समूहले गोली हानी हत्या गरेको छ ।

धनुषाको सीमावर्ती क्षेत्रमा गएराति भएको घटनामा गोली लागेर घटनास्थलमै महिलाको मृत्यु भएको छ । यद्यपि महिलाको पहिचान भने खुल्न सकेको छैन ।

धनुषाका प्रहरी प्रमुख एसपी विश्वराज खड्काले घटनास्थल भारतीय भूमि परेकाले मृतक महिलाको पहिचान हुन नसकेको र शव भारतीय प्रहरीले नै लगेको जानकारी दिए ।

खड्काको अनुसार घटनास्थलमा २ वटा गोलीको खोका फेला परेको छ । महिलाको हत्या गर्ने समूह र मृतक महिला पनि भारतीय नागरिक हुन सक्ने प्रहरीको प्रारम्भिक अनुमान छ । घटनाबारे थप अनुसन्धान भइरहेको धनुषा प्रहरीले जानकारी गराएको छ ।