काठमाडौं— अन्तरजातीय विवाह गरेका कैलालीका एक जोडीले माइती पक्षले निरन्तर मानसिक यातना दिएको गुनासो गरेका छन् । मंगलबार काठमाडौंमा पत्रकार सम्मेलन गर्दै सरस्वती खड्का र सुरेश विश्वकर्माले विवाहपछि आफूहरूमाथि निरन्तर माइती पक्षबाट शारीरिक र मानसिक यातना दिने काम भएको गुनासो गरेका हुन् ।
६ महिनाअघि भागी विवाह गरेका कैलालीका सुरेश र सरस्वतीलाई विवाहपछि पहिलोपटक बुबाले काठमाडौंमा भेटेर कोठामा बोलाएर कुटपिट गरेको उनीहरूको आरोप छ ।
बुबाले भेटेर कोठामा लिएर गएको र सरसल्लाहको लागि सुरेशलाई पनि बोलाउन भनेको सरस्वतीले बताइन् । सुरेशलाई बुबाले कुराकानीकै क्रममा हिँड्दै गर्दा पशुपतिको जंगलतिर लगेर कुटेको आरोप सरस्वतीकाे छ ।
पशुपतिमाथिको जंगलमा लगेर सुरेशलाई भाई र बुबाले कुटपिट गरेको सरस्वतीले बताइन् । उनले भनिन्,‘कुराकानीकै क्रममा बुबाले मिठोमिठो कुरा गर्दै हिँड्दैहिँड्दै पशुपतिको माथिको जंगलतिर लैजानुभयो । जब जंगलको बीचमा पुगेपछि मेरो भाई र बुबा भएर मेरो श्रीमानलाई हातपात गर्नुभयो । सबै कुरा मिलाउँछु र तिमीहरूले जे गरे पनि ठिकै छ, जे नहुनु थियो, गरिहाल्यौ भन्दै सम्झाएको मान्छेले एक्कासी जंगलकोबीचमा लगेर कुटपिट गर्न थालेपछि म चिच्चाएँ ।’
सरस्वतीले माइती पक्षले बारम्बार धम्की दिने र कोठामा गएरै तालाचावी फोड्नेसम्मको हर्कतपछि अहिले गाउँकै भाई पर्नेको कोठामा शरण लिएर बसेको बताइन् । सरस्वतीले आफू र आफ्नो श्रीमानलाई सुरक्षित बाँच्न पाउने वातावरण मिलाइदिन सरोकारवालसमक्ष आग्रह गरेकी छिन् ।
गौशला प्रहरी, माली गाउँ र जगाती प्रहरी कार्यालयमा आफूहरूले उजुरी लिएर जाँदा पनि उल्टै हिनताबोध हुने कुरा गरेर पठाएको उनको आरोप छ । कानुनमा अन्तरजातीय विवाहमा विभेद नभए पनि आफूहरूले प्रहरी प्रशासनबाट समेत विभेद सहन परेको उनीहरूको गुनासो छ ।
उनीहरूले भने,‘समस्या पर्दा प्रहरीहरूले सहयोग गर्छन्, प्रहरीकोमा जानुपर्छ भन्ने हाम्रो मनमा हुन्छ । तिमीलाई अलिकति पनि लाज लाग्दैन ? तिमी मेरो प्रेमी हो, मैले विवाह गरेर आएँ भन्दैछौं तर तिम्रो एकछिनको रोमान्समात्रै हो । जिन्दगी चल्दैन भनेर भन्नुभयो ।’
