चितवनको दासढुंगामा यात्रुबाहक बस दुर्घटना, २८ जना घाइते
काठमाडौं— काँकडभित्ताबाट काठमाडौं आउँदै गरेको यात्रुबाहक बस चितवनको दासढुंगामा दुर्घटना हुँदा २८ जना घाइते भएका छन् ।
जिल्ला प्रहरी कार्यालय चितवनका एसपी रामेश्वर कार्कीले शुक्रबार बिहान पाँच बजे बस दुर्घटना भएको न्यूजगृहलाई जानकारी दिए ।
बाग्मती प्रदेश ०१–००६ ख ५२३७ नम्बरको बस आफैं अनियन्त्रित भएर सडकबाट १० मिटर जति तल खसेको कार्कीकाे भनाइ छ ।
कार्कीका अनुसार दुर्घटनामा २८ जना घाइते भएका छन् । एक चार वर्षीय बालक गम्भीर घाइते छन् । उनको दुबै खुट्टा भाँचिएको छ ।
बस पल्टिएर त्रिशूली नदीतर्फको रुखमा अड्किएको कार्कीले जानकारी दिए । घाइतेहरूको भरतपुरस्थित अस्पतालमा उपचार भइरहेको छ ।
प्रकाशित मिति: शुक्रबार, असार २९, २०८० ०७:२३
थप समाचार
