सिरहा— दलित समुदायमाथि अपमानित व्यहार गरेको भन्दै भगवानपुर गाउँपालिका अध्यक्ष उग्रनारायण यादवलाई कारबाहीको माग गरी सिराहाको गोलबजारमा संयुक्त दलित मोर्चाले प्रदर्शन गरेको छ ।

दलितमाथि सार्वजनिक स्थानमा छोइछिटोको व्यव्यहार गरिनु अपराध भएको भन्दै मोर्चाले गाउँपालिका अध्यक्षलाई कारबाहीको माग गरेको हाे ।

मोर्चाका प्रदेश संयोजक शिवकुमार महराले कानुनको रक्षा गर्ने, कार्यान्वयन नगर्ने व्यक्ति र संस्थाहरू नै दलितमाथि विभेद गर्न उद्देलित भएको बताए ।

उनले भने, ‘कानुन निर्माता र कार्यान्वयन गर्ने व्यक्तिहरूको यस्तै रवैया रहिरहेमा दलितहरू फेरि आन्दोलित हुनुपर्ने देखिन्छ । भगवानपुर घटनाको छानबिन गरी दोषीलाई कारबाही नगरेसम्म हामी आन्दोलनलाई निरन्तरता दिन्छौं ।’

गाउँपालिका अध्यक्ष यादवले किरिया भोजमा बाेलाएर जातीय विभेद गरेका थिए ।