काठमाडौं— दिक्तेलबाट काठमाडौं आउँदै गरेको टाटा सुमोमाथि तोडफोड भएको छ । ना १ ज ६१७२ नम्बरको टाटा सुमोमाथि बीपी राजमार्ग अन्तर्गत काभ्रेको भकुण्डेबेंसीस्थित पात्लेखेतमा बुधबार साँझ तोडफोड भएको छ ।
विपरीत दिशाबाट आउँदै गरेको निजी कारमा सवार व्यक्तिहरूले साइड नदिएको भन्दै टाटा सुमो तोडफोड गरेका हुन् ।
यात्रु लिएर काठमाडौं हिँडेको सुमोमाथि तोडफोड भएपछि चालक केवल राईले गाडी भगाएर काभ्रे प्रहरी चौकी पुर्याएको यातायात प्रालिका अध्यक्ष टेकिन्द्र राईले बताए ।
गाडी तोडफोड भएपछि यात्रु अलपत्र परेको राईले बताए । बिचल्लीमा परेका यात्रुलाई अर्को गाडीको व्यवस्था गरेर गन्तव्यसम्म पुर्याइएको राईले जनाए ।
घटनापछि सार्वजनिक भएको भिडियो क्लिपका आधारमा गाडी तोडफोड गर्नमा संलग्न रहेको आशङ्कामा ९ जनालाई पक्राउ गरेर आवश्यक अनुसन्धान थालिएको जिल्ला प्रहरी कार्यालय काभ्रेका सूचना अधिकारी प्रहरी नायब उपरीक्षक मीनबहादुर घलेले बताए ।
