बर्दिया — राजापुर नगरपालिका–८ स्थित हुलाकी सडकमा यात्रुवाहक भ्यानले ठक्कर दिँदा एकजनाको मृत्यु भएपछि स्थानीयले चक्काजाम गराएका छन्।

लु २ ख ५९१९ नम्बरको गाडीले भे ४ प ७८३ नम्बरको मोटरसाइकललाई ठक्कर दिएको प्रहरीले जनाएको छ।

गाडीको ठक्करबाट मोटरसाइकल चालक राजापुर–८ का ५४ वर्षीय चेतुका थारूको आइतबार साँझ मृत्यु भएको जिल्ला प्रहरी कार्यालयले जनाएको छ।

स्थानीयका अनुसार तीव्र गतिबाट आएको उक्त गाडीले मोटरसाइकललाई ठक्कर दिएको थियो।

गाडी चालक बाँकेका विकास सिंह ठकुरीलाई प्रहरीले नियन्त्रणमा लिएको छ। मृतकका आफन्त र स्थानीयले सोमबार बिहान ७ बजेदेखि चक्काजाम गराएपछि आउजाउ ठप्प भएको छ।