काठमाडौंं— काठमाडौं उपत्यकाको न्यूनतम तापक्रम १० डिग्री सेल्सियसबाट तल झरेको छ।

सोमबार १०.५ डिग्री सेल्सियस मापन भएकामा आज काठमाडौं उपत्यकाको न्यूनतम तापक्रम घटेर ९.९ डिग्री सेल्सियस मापन भएको हो।

मौसम पूर्वानुमान महाशाखाकी मौसमविद् बिनु महर्जनका अनुसार मंगलबार बिहान पौने ९ बजेको रेकर्ड भएको योे न्यूनतम तापक्रम यो वर्षकै कम हो।

न्यूनतम तापक्रम घटेसँगै चिसो बढ्दै गएको छ। यस्तै आज काठमाडौं उपत्यकामा हल्का बदली भए पनि सामान्यतया मौसम सफा नै रहनेछ।

त्यस्तै कोशी प्रदेश र गण्डकी प्रदेशका पहाडी भूभागका एकदुई स्थानमा हल्का वर्षाको सम्भावना छ। अन्य भूभागको मौसम भने सामान्यतया सफा नै रहने महाशाखाले जनाएको छ।