पाँचथर— घरमा आगलागी हुँदा सदरमुकाम फिदिम नगरपालिका-२ का जयप्रकाश राई गम्भीर घाइते भएका छन्। उनको घर पूर्ण रुपमा क्षति भएको जिल्ला प्रहरी कार्यालय पाँचथरका प्रहरी निरीक्षक बेनिलाल साहले जानकारी दिए।

घरमा आगो सल्किएपछि जोगाउने प्रयास गर्दा राई गम्भीर घाइते भएका हुन्। राईको घरमा मङ्गलबार अपरान्ह ४ बजेतिर आगो सल्केको प्रहरीले जनाएको छ।

घरभित्र राखिएको ग्यास पड्किएकाले ग्यास लिक भएर आगो सल्केको हो कि? भनेर अनुमान गर्न सकिने साहले बताए। यद्यपि आगलागीको कारण यकिन नभएको उनको भनाइ छ।

आगोले शरीरका विभिन्न भागमा जलेका राईको अवस्था गम्भीर रहेकाले पाँचथरमा उपचार सम्भव नभएपछि झापातर्फ पठाइएको प्रहरीले जनाएको छ।

आगो फिदिम नगरपालिकाका दुइटा दमकलसहित स्थानीय, सेना, प्रहरी र सशस्त्र प्रहरीको प्रयासमा नियन्त्रणमा आएको छ।