काठमाडौं— सहकारीको रकम दुरुपयोग सम्बन्धमा छानबिन गर्न गठित संसदीय विशेष समितिले शुक्रबार पूर्वउपराष्ट्रपति नन्दबहादुर पुनका छोरा दिपेशसँग बयान लिने भएको छ।

बिहीबार नै बयान लिए भनिए पनि ढिला सहभागी भएकाले आज मात्रै बयान लिने क्रम सुरु गरिने समिति सदस्य सरिता भुसालले जानकारी दिइन्।

त्यसका लागि समितिको बैठक बस्दैछ। सुप्रिम सहकारीमा कोषाध्यक्ष रहेका दिपेश करिब १० हजार बचतकर्ताको ७८ करोड ५० लाख रुपैयाँ हिनामिनामा जोडिएको भन्दै गत चैत २ गते पक्राउ परी धरौटीमा छुटेका थिए। 

शुक्रबार बिहान ११ बजेदेखि सनराइज बचत तथा ऋण सहकारी संस्थाका सञ्चालक नगेन्द्र बहादुर रिमाललाई जेलबाट झिकाएर बयान लिँदैछ। त्यस्तै धरानको बराह बचत तथा ऋण सहकारी संस्थाका सञ्चालक मान विश्वकर्मासँग पनि बयान लिनेछ। 

समितिले बिहीबार ओरियन्टल सहकारीका अध्यक्ष सुधीर बस्नेतसँग बयान लिएको थियो। त्यस्तै सुप्रिम सहकारीका सञ्चालक ओमबहादुर गुरुङको पनि जेलबाट झिकाएर समितिले बयान लिएको छ। यही सहकारीकी कर्मचारी रोशनी गुरुङको पनि बयान लिइएको छ। समितिले जेलमा रहेका हालसम्म ९ जनाको बयान लिइसकेको छ। 

समितिले सहकारी घोटाला प्रकरणमा पूर्वगृहमन्त्री रवि लामिछानेसँग पनि केही दिनमै सोधपुछ गर्ने तयारी गरेको छ।