काठमाडौं— नेपाल कमर्स क्याम्पस मीभवनका प्राध्यापक धर्मराज विष्ट हत्यामा संलग्न भएको आरोपमा पक्राउ परेका व्यक्तिलाई प्रहरीले सार्वजनिक गरेको छ।
पक्राउ पर्नेमा काठमाडौं कोटेश्वरका ३९ वर्षीय रञ्जन खड्का छन्। काठमाडौं उपत्यका अपराध अनुसन्धान कार्यालयको टोलीले भारतको बैङ्गलोरबाट उनलाई पक्राउ गरी ल्याएको हो। हत्या पछिको १७ वर्षसम्म उनी फरार थिए। उनी भारतमा रंग लगाउने काम गर्दै आएको प्रहरीले जनाएको छ।
पक्राउ परेका खड्काले प्रा विष्टलाई सुरुमा गालामा थप्पड हानेको र अन्य व्यक्तिले रडले प्रहार गरेर हत्या गरेको पाइएको अपराध अनुसन्धान कार्यालयका एसएसपी सानुराम भट्टराईले जानकारी दिए।
यसअघि हत्यामा संलग्न भएको आरोपमा चैत ६, २०८० मा धादिङको गङ्गाजमुना गाउँपालिका–७ घर भई ललितपुर ढोलाहिटी बस्ने ४१ वर्षकी सविता थापा अधिकारी भनिने सोभिता थापा पक्राउ परेकी थिइन्। उनी भने ३ लाख धरौटीमा छुटिसकेकी छन्।
असार २६, २०६४ मा ललितपुर महानगरपालिका–२२ शङ्खमूलमा ललितपुर इमाडोल घर भई नेपाल कमर्स क्याम्पसमा पढाउँदै आएका ३३ वर्षीय विष्ट बेहोस अवस्थामा भेटिएका थिए।
शरीरका विभिन्न भागमा चोट लागेको अवस्थामा भेटिएका उनको उपचारका क्रममा मृत्यु भएको थियो। अनुसन्धान गर्दा उनको हत्या भएको खुलेको थियो।
