काठमाडौं— राष्ट्रिय परीक्षा बोर्ड, परीक्षा नियन्त्रण कार्यालयले गत वर्ष सञ्चालन गरेको माध्यमिक शिक्षा परीक्षा (एसईई)को नतिजा सार्वजनिक गरेको छ।

सार्वजनिक गरिएको नतिजाअनुसार जीपीए ३.६० देखि ४ ल्याउने विद्यार्थीको संख्या ३१ हजार २ सय ९ रहेको छ । यस्तै ३.२० देखि ३.६० जीपीए ल्याउने विद्यार्थीको संख्या ६८ हजार २ सय ५६ रहेको छ। 

बिहीबार सार्वजनिक गरिएको नतिजाअनुसार २.८० देखि ३.२० जीपीए ल्याउने विद्यार्थीको संख्या ७८ हजार ८ सय ७४ रहेको छ। जीपीए २.४० देखि २.८० ल्याउने विद्यार्थी ४१ हजार १ सय ७७ रहेका छन्। यस्तै जीपीए २.०० देखि २.४० ल्याउने २ हजार ९ सय ५० विद्यार्थी रहेका छन्।

यस्तै जीपीए १.६० देखि २.० ल्याउने विद्यार्थी भने जम्मा ६ जना रहेका छन्। बोर्डका अध्यक्ष महाश्रम शर्माका अनुसार परीक्षामा सहभागी ४ लाख ६४ हजार ७ सय ६५ विद्यार्थीमध्ये २ लाख २२ हजार ४ सय ७२ जना कक्षा ११ मा भर्ना हुन योग्य भएका छन्।

बोर्डका अनुसार ननग्रेडिङ(एनजी) हुने विद्यार्थीको संख्या २ लाख ४२ हजार ३ सय १३ रहेको छ। तीमध्ये २ विषयमा एनजी हुने विद्यार्थी संख्या १ लाख १५ हजार ८ सय ३४ छ। यिनीहरू यही साउन १८ र १९ गते हुने ग्रेडवृद्धि परीक्षामा सहभागी हुन पाउने अध्यक्ष शर्माले बताए।

एसईई नतिजा:  १८६ विद्यार्थीले ल्याए चार जीपीए, आधा बढी परीक्षार्थी फेल