काठमाडौं—  आफूलाई तपस्वी दाबी गर्ने रामबहादुर बम्जन बाल यौन दुराचार मुद्दामा दोषी ठहर भएका छन्। 

सोमबार सर्लाही जिल्ला अदालतका न्यायाधीश जीवनकुमार भण्डारीको इजलासले बम्जनलाई दोषी ठहर गरेको हो। तर उनको कसुर निर्धारण भने आगामी असार १७ गते मात्रै हुनेछ।

बाल यौन दुर्व्यवहारको कसुरमा दोषी ठहर भएका बम्जनलाई १२ देखि १४ वर्ष कैद सजाय हुन सक्छ। जिल्ला अदालतका स्रेस्तेदार सदन अधिकारीका अनुसार बम्जनले बालबालिका सम्बन्धी ऐन, २०७५ को दफा ६६ (३) 'छ' अनुसारको कसुर गरेको ठहर भएको छ। दफा ६६ मा बालबालिकाविरूद्वका कसुरहरू उल्लेख गरिएको छ। उक्त दफाअन्तर्गत उपदफा (३) मा बाल यौन दुर्व्यवहार गरेको मानिने अवस्था किटान गरिएको छ।

र, उपदफा (३) 'छ' मा यौन सन्तुष्टि प्राप्त गर्न बालबालिकालाई प्रयोग गर्ने वा गराउने कार्यलाई बाल यौन दुर्व्यवहार मानिएको छ। यस कसुरमा जबरजस्ती करणी सहर सजाय हुन्छ। 

अधिकारीका अनुसार, बम्जनलाई १२ देखि १४ वर्षसम्म कैद सजाय हुन सक्नेछ। मुलुकी अपराध संहिता, २०७४ मा १४ देखि १६ वर्षभन्दा कम उमेरकी बालिकामाथि जबरजस्ती करणी भए १२ देखि १४ वर्ष कैद सजाय हुने व्यवस्था छ।

नेपालमा १८ वर्षभन्दा कम उमेरका व्यक्तिलाई बालबालिका मानिएको छ। यस उमेरसमूहका व्यक्तिको मन्जुरी लिएर पनि यौनजन्य व्यवहार वा विवाह गर्न कानुनले वर्जित गरेको छ।

यस मुद्दामा बहस गरेका जिल्ला न्यायाधिवक्ता कैलाश दाहालका अनुसार, २०७३ साउन २० गते अन्तिमपल्ट ती बालिकामाथि अपराध भएको थियो। त्यसबखत पीडितको उमेर १५ वर्ष १ महिना थियो।

यस्तो अपराधमा पीडित १८ वर्ष पुगेपछिको एक वर्षसम्म उजुर गर्न पाउँछन्। ती पीडित किशोरीले २०७६ माघमा प्रहरीमा जाहेरी दिएकी थिइन्।

न्यायाधिवक्ता दाहालका भनाइमा, बालबालिकासम्बन्धी ऐन, २०४८ कै व्यवस्था पछिल्ला कानुनमा पनि निरन्तर रहेकाले यस मुद्दामा हकदैया र हदम्याद सम्बन्धी कुनै विवाद थिएन।