पाल्पा— बुधबार बेलुका पाल्पामा भएको जीप दुर्घटनामा परी एक जना बालकसहित २ जनाको मृत्यु भएको छ।

मृत्यु हुनेमा निस्दी गाउँपालिका-४ का ६ वर्षीय राजीव सुनारी र सोही वडाका २० वर्षीय तेजन सोमै छन्।

उनीहरूको उपचारका क्रममा गएराति मृत्यु भएको हो। जिल्ला प्रहरी कार्यालय पाल्पाका सूचना अधिकारी सुगन्ध श्रेष्ठले जानकारी दिए। दुर्घटनामा १३ जना घाइते छन्।

बुधबार बेलुका नवलपुरको अरूणखोलाबाट पाल्पाको निस्दी गाउँपालिका-४ तर्फ आउँदै गरेको लु १ ज ३३२४ नम्बरको जीप दुर्घटना भएको थियो। घाइतेमध्ये ३ जनाको अवस्था गम्भीर रहेको प्रहरीले जनाएको छ। १० जनाको अवस्था भने सामान्य छ।

दुर्घटनामा पर्ने सबै निस्दी गाउँपालिका- ४ का हुन्। १५ जना सवार जीप बुधबार बेलुका पौने ६ बजेतिर दुर्घटनामा परेको प्रहरीले जनाएको छ।