News Griha :: न्यूजगृह
त्रिशूली दुर्घटना: छोराको अन्येष्टि गरेर फर्किएकी थिइन् हरिमाया
तस्बिर: एपीएफ

काठमाडौं— शनिबार बिहानमा ट्याक्सी त्रिशूलीमा खसेर दुर्घटना हुँदा मृत्यु भएका पाँचै जनाको परिचय खुलेको छ। दुर्घटनामा पर्नेमा गोरखाको रोका परिवार र उनका आफन्त रहेका छन्।

काठमाडौंबाट गोरखा जाँदै गरेको बा२ज ४१९६ नम्बरको ट्याक्सी बिहान सवा ७ बजे चितवनको इच्छाकामना गाउँपालिका–५ सिमलधारास्थित पृथ्वी राजमार्गबाट त्रिशूली नदीमा खसेको थियो। 

जिल्ला प्रहरी कार्यालय चितवनले ट्याक्सीमा चालकसहित ६ जना सवार रहेकोमा दुर्घटनामा पाँच जनाको मृत्यु भएको र एक जना बेपत्ता रहेकाले खोजी कार्य जारी रहेको जनाएको छ। 

मृत्यु हुनेमा ७० वर्षीय जुनमाया रोका, उनकी जेठी छोरी हरिमाया रोका(उपरकोटी), हरिमायाको छोरा आगमन उपरकोटी, जुनमायाको कान्छी छोरी अन्जना रोका, माइला ज्वाइँ ट्याक्सी चालक गोरखा नगरपालिका–७ का ३५ वर्षीय अर्जुन शिर्मल छन्। हरिमायाका नाति दिवस रोका भने बेपत्ता छन्। 

Mugling_taxi_accident_five_death_1-1711782611.jpg
तस्बिर: हीरालाल गुरुङ/रासस

गोरखा नगरपालिका-७ का वडाअध्यक्ष विष्णुप्रसाद श्रेष्ठका अनुसार मृतक एकै परिवारका आफन्त हुन। उनीहरु जुनमाया रोकाका छोरा ३९ वर्षीय शंकर रोकाको शुक्रबार राती पशुपतिमा अन्त्यष्टि गरेर शनिबार बिहान घर फर्कने क्रममा दुर्घटनामा परेका हुन्। 

‘जुनमायाको छोरा शंकरजीको हिजो काठमाडौंमा मृत्यु भएकाले उहाँहरु (मृतक शंकर)का आमा, छोरा, दिदीबहिनी, ज्वाइँ, भान्जा सबै पशुपतिमा अन्त्येष्टि सकाएर आज घर फर्किदै गर्दा दुर्घटनामा पर्नुभएछ। शंकरजीलाई क्यान्सर थियो भन्ने सुनेको छु। रोका परिवारमा ठूलो आपत आएको छ,’ वडाध्यक्ष श्रेष्ठले भने। 

मृतक रोका परिवार र आफन्त शंकरको अन्तिम संस्कार सकेर माइक्रो र ट्याक्सीमा शनिबार घर फर्किँदै थिए। शंकरको श्रीमती भने अर्कै गाडीमा बसेकाले दुर्घटनाबाट जोगिएको श्रेष्ठले जानकारी दिए। 

दुर्घटना भएको थाहा पाउनासाथ आफू दुर्घटना स्थलमा पुगेको बताएका वडाअध्यक्ष श्रेष्ठले मृतक परिवार रोकाया नभएर रोका भएको पुष्टि गरेका छन्। 

muglin_accident_taxi_five_death-1711782611.jpg
तस्बिर : हीरालाल गुरुङ/रासस

Nepali-Patro-innerNepali-Patro-inner
प्रकाशित मिति: शनिबार, चैत १७, २०८०  १२:१८
Weather Update