काठमाडौं— अछाममा ट्र्याक्टर दुर्घटना हुँदा ५ जनाको मृत्यु भएको छ। दुर्घटनामा अन्य ३ जना घाइते भएका छन्। 

सुदूरपश्चिम प्रदेश ०१००२ त ४९७९ नम्बरको ट्र्याक्टर आज (सोमबार) बिहान मेल्लेख गाउँपालिकामा दुर्घटनामा परेको जिल्ला प्रहरी कार्यालय अछामका प्रहरी निरीक्षक (इन्सपेक्टर) अर्जुन साउँदले जानकारी दिए। 

इन्सपेक्टर साउदका अनुसार उक्त ट्र्याक्टरमा ८ जना सवार थिए। घाइते ३ जनालाई उपचारका लागि बयलपाटा अस्पताल लगिएको छ। 

४ जनाको घटनास्थलमा नै र अर्का १ जनाको उपचारका लागि लैजाने क्रममा मृत्यु भएको प्रहरीले जानकारी दिएको छ। 

मृत्यु हुनेमा मेल्लेख गाउँपालिका–१ का ५५ वर्षीय रङ्ग धामी, १५ वर्षीय जनक धामी, ४५ वर्षीय प्रेम धामी, ३७ वर्षीय नरबहादुर धामी र २१ वर्षीय जनक धामी रहेका इन्सपेक्टर साउँदले जानकारी दिए। 

दुर्घटनामा ४२ वर्षीय लालबहादुर धामी, ४० वर्षीय हंस धामी र एक बालक घाइते भएका छन्। 

षोडशाबाट साँफेबगरतर्फ आउँदै गरेको ०१००२ त ४९७९ नम्बरको ट्र्याक्टर सुयडी नजिकै दुर्घटना भएको हो। मृतक र घाइते सबै एउटै वडका बासिन्दा हुन्।