काठमाडौं— नेकपा एमालेले फागु पर्व होलीको अवसरमा शनिबार सांगीतिक कार्यक्रम आयोजना गरेको छ। 

रंगहरूको पर्व होलीको अवसरमा शुभकामना आदानप्रदानसहित सांगीतिक कार्यक्रम सञ्चालन गरिने कार्यक्रमका व्यवस्थापक एमाले नेता लालबाबु पण्डितले जानकारी दिए। 

पार्टी अध्यक्ष केपी शर्मा ओलीको उपस्थितिमा हुने कार्यक्रममा दुई हजार पाँच सयभन्दा बढीले होली खेलिने पण्डितले बताए। 

उनले भने, ‘हामीले होलीमा शुभकामना साटासाट गर्न होली विशेष कार्यक्रमको आयोजना गरेका छौँ। पार्टी अध्यक्ष केपी शर्मा ओलीसहित दुई हजार पाँच सयभन्दा बढीको कार्यक्रममा सहभागिता रहने अपेक्षा गरिएको छ। त्यो कार्यक्रममा औपचारिक कुरा धेरै हुँदैन्। रमाइलो गर्ने हो।’

उनले‍ होलीको अवसरमा शनिबार दिउँसो १२ बजेदेखि सुरु हुने कार्यक्रममा रंगको सट्टा अबिरको प्रयोग गरिने बताए।