काठमाडौं—  गत कार्तिक २६ गते लक्ष्मीपूजाको राति मोरङको उर्लाबारी भएको आगलागीमा घाइते भएका एक जनाको उपचारको क्रममा मृत्यु भएको छ ।

उर्लाबारी– ७ स्थित आफ्नै घरमा दीपक कार्कीले सञ्चालन गरेको स्नेहा सुनचाँदी पसलमा आगलागी हुँदा घाइते भएका सोही स्थानका  ४३ वर्षीय तपन पण्डितको मृत्यु भएको हो ।  

पण्डितको काठमाडौंस्थित कीर्तिपुर बर्न अस्पतालमा मंगलबार बिहान २ बजेतिर मृत्यु भएको प्रहरीले जनाएको छ । सोही अस्पतालमा गम्भीर अवस्थाका ८ जनाको आईसीयूमा उपचार भइरहेको जनाइएको छ । 

आगलागीमा ४ प्रहरी र २४ स्थानीय घाइते भएका थिए । प्रहरीका अनुसार आगलागीबाट ३ करोड ४१ लाखभन्दा धेरैको क्षति भएको छ । आगलागीका कारण भने अहिलेसम्म खुलेको छैन ।