काठमाडौं— काठमाडौं महानगरपालिका– १६ का वडाध्यक्ष मुकुन्द रिजालको निमोनियाका कारण निधन भएको चिकित्सकले बताएका छन्।
धापासीस्थित ग्राण्डी अस्पतालमा उपचाररत रिजालको बिहीबार बिहान ७ः३० बजे निधन भएको थियो । वडाध्यक्ष रिजाललाई उपचारका लागि भदौ १७ गते सोही अस्पताल भर्ना गरिएको थियो । अस्पतालको सघन उपचार कक्षमा उपचार गराइरहेका रिजालको दुवै फोक्सोमा सिभियर निमोनिया (भाइरलनिमोनिया) का कारण निधन भएको अस्पतालका स्वास्थ्य निर्देशक डा. विनोद विजुक्छेले बताए ।
सुरुमा श्वासप्रश्वासको समस्या देखिए पनि पछि उनमा रगतको संक्रमण र मिर्गौलामा पनि असर परेको चिकित्सकहरुले बताएका छन् ।
नेपाली कांग्रेस काठमाडौं क्षेत्र नं ७ का क्षेत्रीय सभापतिसमेत रहेका वडाध्यक्ष रिजाल २०७९ सालमा सम्पन्न स्थानीय तहको निर्वाचनमा काठमाडौं महानगरपालिका– १६ मा दोस्रोपटक वडाध्यक्षमा निर्वाचित भएका हुन् । वडाध्यक्ष रिजालका श्रीमती र दुई छोरा छन् ।
उनको आजै पशुपति आर्यघाटमा अन्त्येष्टि गरिने परिवारका सदस्यले जानकारी दिए । त्यसअघि रिजालको पार्थिव शरीर श्रद्धाञ्जलिका लागि राष्ट्रिय सभागृहमा राखिने छ ।
