काठमाडौं— नेपाली कांग्रेसका सहमहामन्त्री महेन्द्र यादवमाथि बुधबार भएको सांघातिक आक्रमणको विरोधमा कांग्रेसको भातृ संगठन नेपाल विद्यार्थी संघ (नेविसंघ) ले काठमाडौंमा राँके जुलुस निकालेको छ ।

रिपोटर्स क्लबमा आयोजित साक्षात्कार कार्यक्रम सकेर फर्किने क्रममा कांग्रेस सहमहामन्त्री यादवमाथि नुवाकोटको विदुर नगरपालिका–७ घर भएका ४७ वर्षीय श्याम सापकोटाले सांघातिक आक्रमण गरेका थिए ।

नेविसंघले आक्रमणकारीलाई कडा कारबाही र गृहमन्त्री नारायणकाजी श्रेष्ठको राजीनामा माग गर्दै राँके जुलुस निकालेको हो ।

नेविसंघका केन्द्रीय सदस्य अनुराग शाहले भने, ‘हाम्रो पार्टीका  सहमहामन्त्री महेन्द्र यादवलाई सांघातिक आक्रमण गरेको विरोधमा आरआर क्याम्पस अगाडि राँके जुलुस निकालेका छौं ।’