काठमाडौं— ६० किलो सुन तस्करी प्रकरणमा प्रहरीको केन्द्रीय अनुसन्धान ब्युरो (सीआईबी) ले पूर्वउपराष्ट्रपति नन्दकिशोर पुनका छोरा दिपेशको बयान लिएको छ ।
महाराजगञ्जस्थित ब्युरो कार्यालयमा पुगेर सोमबार दिउँसो दिपेशले तीन घण्टा बढी बयान दिएको प्रहरी उच्च स्रोतले बतायो । ६० किलो सुन तस्करी प्रकरणमा छानबिनको दायरामा आएका व्यक्तिहरुसँग उठवस देखिएपछि उनकोे बयान लिइएको स्रोतको दाबी छ ।
गत साउन ३ मा राजश्व अनुसन्धान विभागले सुन लुकाएर ल्याइएको १५५ किलो ‘ब्रेक शु’ बरामद गरेको थियो । त्यसको १९ दिनपछि यो प्रकरणको अनुुसन्धानको सम्पूर्ण जिम्मा सीआईबीले पाएको हो। त्यसक्रममा यसमा संलग्न ६ विदेशी नागरिकसहित २५ जना पक्राउ परिसकेका छन् ।
यसमा पक्राउ परेका बेल्जियन नागरिक दावा छिरिङको माओवादी नेताहरुसँग सम्पर्क देखिएको छ । उनले रोल्पाकी माओवादी नेतृ अमला रोकासँग विवाह गरेका छन् । ६० किलो सुनसँग सम्बन्ध देखिएको भेपमार्फत तस्करी भएको ९ किलो सुन प्रकरणमा पूर्वसभामुख कृष्णबहादुर महराका छोरा राहुल हिरासतमा छन् ।
