काभ्रे— दश दिनमा आठ जनाले आत्महत्या गरेपछि इलाका प्रहरी कार्यालय बनेपाले आत्महत्या रोकथाम गर्न विद्यालय स्तरमा सचेतना अभियान थालेको छ ।
उक्त अवधिमा आत्महत्या गर्ने आठमध्ये छ विद्यार्थी भएपछि प्रहरीले पहिलो चरणमा विद्यालय स्तरमा सचेतना अभियान थालेको जनाएको छ ।
दिनहुँ आत्महत्याका घटना भइरहँदा इलाका प्रहरी कार्यालय बनेपाले बनेपा नगरपालिका, पनौती नगरपालिका र बेथानचोक गाउँपालिकामा अभियान सञ्चालन गरेको हो ।
‘जनचेतनामूलक मनोबल अभिवृद्धि कार्यक्रम’ नाम दिई सञ्चालन गरिएको सचेतनाका लागि अधिकृत स्तरका प्रहरी तथा बनेपास्थित शिर मेमोरियल अस्पतालका मनोसामाजिक परामर्शकर्तासहित विद्यालयका कक्षा कोठामा कार्यक्रम सञ्चालन गरिएको हो ।
‘दिनदिनै आत्महत्याका डर लाग्दा घटना भएकाले अभियान सञ्चालन गरिरहेका छौँ,’ इप्रका बनेपाका इञ्चार्ज प्रहरी नायब उपरीक्षक रेशम बोहोराले भने ।
पहिलो चरणमा एक हप्ता सञ्चालन गरिने सचेतनामा करिब ५० विद्यालयमा कार्यक्रम गरिने योजना बनाएको जनाइएको छ ।
विद्यालय स्तरको अभियान प्रभावकारी हुने अपेक्षा गरिएको सहभागी अभिभावकले बताएका छन् ।
