हुम्ला— नागरिक उड्डयन प्राधिकरणले साउन १२ गतेदेखि हुम्लासहित कर्णालीका हिमाली जिल्लामा दिउँसो १२ः३० पछि उडान भर्न नपाउने नयाँ नियम ल्याएपछि हुम्लाका नागरिक आन्दोलित भएका छन् ।
प्राधिकरणको नियमका कारण हवाई जहाज र हेलिकप्टरले हुम्लामा उडान नभर्दा चार बालबालिकाको मृत्यु भएपछि हुम्लाबासी आन्दोलित भएका हुन् ।
नेपाल एयरलाइन्सले उडान नभरेको हुम्लामा निजी एयरलाइन्सको उडानसमेत बन्द लगाउँदा चार बालबालिकाको मृत्यु भएको र खाद्यान्न, दैनिक उपभोग्य सामग्रीजस्तामा अभाव खेप्नु परेको सिमकोट गाउँपालिका पूर्वअध्यक्ष पदमबहादुर लामाले बताए ।
प्राधिकरणको नियमविरुद्ध बुधबार बिहान त्यहाँका नागरिक समाज, स्थानीय तहका जनप्रतिनिधि, राजनीतिक दल, पत्रकार महासंघलगायतले सिमकोट विमानस्थलमा धर्ना दिएर आन्दोलन गरेका थिए ।
प्राधिकरणका महानिर्देशक प्रदीप अधिकारीले नीहित स्वार्थ राखेर हवाई उडानमा नयाँ नियम ल्याएको उनीहरूको आरोप थियो ।
प्राधिकरणले १२ः३० बजेपछि हुम्लासहित २९ वटा विमानस्थलमा हवाई उडानमा लगाएको र नयाँ निमयविरुद्ध आफू पनि आन्दोलनमा उत्रिएको नागरिक समाजका अध्यक्ष गणेश महतले बताए ।
हिमाली जिल्लाका लागि यो नियम पहिलो भएसँगै हुम्लीबासी मारमा परेको नेपाल पत्रकार महासंघका जिल्ला अध्यक्ष राजन रावतको भनाइ थियो ।
नियम लागू हुनुभन्दा पहिला नेपालगञ्ज र सुर्खेतबाट निजी एयरलाइन्सले साँझ ५ बजेसम्म आफ्नो नियमित उडान गर्दै आएका थिए । अहिले उक्त उडानसमेत ठप्प भएको छ ।
