काठमाडौं— हङ्कङबाट मोटरसाइकलको ‘ब्रेक शु’भित्र लुकाएर ल्याएको सुनको गुणस्तर नापजाँच सुरु हुने भएको छ ।
नेपाल राष्ट्र बैंकको टक्सार महाशाखा प्रमुख थानेश्वर आचार्यले सुनको गुणस्तर नापजाँच सुरु हुने जानकारी दिए ।
ब्रेक शुबाट निकालेको सुन गालेर जोख्दा ६० किलो ७१६ ग्राम भएको थियो । उनका अनुसार उक्त सुनलाई ३४ वटा बिस्कुट बनाइएको छ ।
सुन जोखेपछि पत्रकार सम्मेलनमा बोल्दै महाशाखा प्रमुख आचार्यले भने, 'अब यो सुनको गुणस्तर कति हो ? ‘पेओर’ सुन हो ? वा कमसल सुन हो ? जे हो, त्यो अब एक हप्ताभित्र तपाईहरूले थाहा पाउनु हुन्छ ।’
उनले सुनको गुणस्तर नाप्ने मेसिन आफूहरूसँगै भएको बताउँदै जाँच सुरु हुने जानकारी दिए ।
मंगलबार बिहान नेपाल राष्ट्र बैंकको टक्सार महाशाखामा सरोकारवाला निकाय र सुरक्षा निकायका प्रतिनिधिको रोहबरमा सुन गालेको थियो ।
गालेपछि सुनको मात्रा केही घटेको हो । अब गुणस्तर र आर्थिक परीक्षणको काम सुरु हुने भएको छ ।
भन्सार जाँचपास भएर सिनामंगलको रोडमा निकालिएको सुन राजस्व अनुसन्धान विभागले साउन ३ गते बरामद गरेको थियो । सुनसहित १५५ किलो ब्रेक शु बरामद गरी सार्वजनिक गरिएको थियो ।
