काठमाडौं— शैक्षिक प्रमाणपत्र किर्ते अभियोगमा पक्राउ परेका नेपाली कांग्रेसका नेता तथा सांसद सुनिल शर्माको सचिवालयले प्रतिशोध साध्न पक्राउ गरिएको बताएको छ । केन्द्रीय अनुसन्धान ब्यूरो (सीआईबी) ले सो अभियोगमा बिहीबार शर्मालाई उनको निवासबाटै पक्राउ गरेको थियो ।
शर्मा पक्राउ परेपछि उनको सचिवालयले साँझ विज्ञप्ति जारी गर्दै सय किलो सुन तस्करीको विषयलाई लिएर गृहमन्त्री नारायणकाजी श्रेष्ठ र अर्थमन्त्री डा.प्रकाशशरण महतको राजीनामा मागेकै कारण प्रतिशोध साध्न पक्राउ गरिएको दाबी गरेको छ ।
शर्माका स्वकीय सचिव विवेक लिम्बूले जारी गरेको विज्ञप्तिमा भनिएको छ,‘माननीय सुनिल कुमार शर्माज्यूलाई प्रतिशोध साध्ने हेतुले संघीय संसदमा सुन तस्करीको विषयलाई लिएर अर्थमन्त्री र गृहमन्त्रीको राजीनामा माग गरेको कारण निज निवास गोल्फुटारबाट संसदको अधिवेशन चालु रहेको अवस्थामा बहालवाला सांसदलाई सभामुखको बिनाअनुमति र पक्राउ पुर्जीसमेत जारी नगरी नेपाल प्रहरीको केन्द्रीय अनुसन्धान ब्यूरो (सीआईबी) क्रुरतापूर्वक पक्राउ गरेको कुरा आम जनसमुदायलाई जानकारी गराउँदछौं ।’
जनताको पक्षमा आवाज उठाउँदा गृहमन्त्री र प्रधानमन्त्रीले रिसीबी साध्ने मनसायले वाक् स्वतन्त्रताको खिल्ली उडाउँदै सत्ता र शक्तिको चरम दुरुपयोग गरेर शर्मालाई पक्राउ गरिएको सचिवालयले विज्ञप्तिमा भनेको छ । शर्मामाथि लागेको अभियोगको छानबिनमा सहयोग गर्ने पनि सचिवालयले उल्लेख गरेको छ ।
यो पनि पढ्नुहोस
