काठमाडौं— नेपाल समाजवादी पार्टी (नेसपा) का अध्यक्ष तथा पूर्वप्रधानमन्त्री डा.बाबुराम भट्टराईले गौर हत्याकाण्ड सुविचारित ढंगले मच्चाएको नृशंस हत्याकाण्ड रहेको टिप्पणी गरेका छन् ।

हत्याकाण्डका पीडितहरूले न्याय खोज्दै आन्दोलन गरिरहेको सन्दर्भमा सामाजिक सञ्जालमार्फत टिप्पणी गर्दै अध्यक्ष डा.भट्टराईले पीडित आन्दोलनकारीहरूलाई पटक–पटक फोस्रा आश्वासन दिनुको कुनै अर्थ नहुने बताए ।

डा.भट्टाराईले ट्विटरमा लेखेका छन्,‘गौर हत्याकाण्डको आन्तरिक र बाह्य जरो नखोतलिकन र सत्ताको अंकगणितभन्दा माथि नउठिकन यसबारे पीडित आन्दोलनकारीहरूलाई पटक–पटक फोस्रा आश्वासन दिनुको कुनै अर्थ हुन्न । स्मरणरहोस्, यो विभत्स हत्याकाण्ड कुनै राज्यविरुद्धको विद्रोहको क्रममा घटेको र शान्ति प्रक्रियासँग जोडिएको घटना होइन । यो त मधेसका उत्पीडित वर्ग र समुदायका निहत्था नागरिकहरूलाई मुक्तिआन्दोलनबाट विमुख पार्न देशभित्र र बाहिरका वर्चस्वशाली शक्तिहरूले सुविचारित ढंगले मच्चाएको नृशंस हत्याकाण्ड थियो । तिनै वर्चस्वशाली भित्री र बाहिरी शक्तिको टेकोपुँडोमा अडेको यो सरकारको नेतृत्वले पीडितलाई न्याय दिने हिम्मत र हैसियत राख्ला ? भविष्यले बताउनेछ ।’

वर्तमान सरकारले पीडितलाई न्याय दिनेप्रति पनि उनले शंका गरेका छन् । उनले थप लेखेका छन्,‘शान्ति प्रक्रिया र संविधान निर्माणको विशिष्ठ कालखण्डमा हामीले चाहेर पनि यसबारे केही गर्न नसकेकोमा आत्मालोचित छौं । सत्य र न्यायका पक्षधर शक्तिहरूको दबाब र खबरदारी जारी रहोस् । सत्य र न्यायको जीत एक दिन अवश्य हुनेछ ।’