काठमाडौं— राष्ट्रिय स्वतन्त्र पार्टी (रास्वपा)का सभापति रवि लामिछानेले आफू निर्वाचित भएको सय दिनको अवसरमा ल्याएको ‘मोबाइल क्लिनिक’को गाडी फिर्ता गरिएको छ । उनी गत वैशाख १० गतेको उपनिर्वाचनमा चितवन–२ बाट पुनः निर्वाचित भएका थिए ।
लामिछानेले आफ्नो निर्वाचन क्षेत्रका ६५ वर्षभन्दा माथिका वृद्धवृद्धालाई टोलटोलमा गएर स्वास्थ्य उपचार गर्ने भन्दै ना २ ख ५६१९ नम्बरको एम्बुलेन्स पुरानो मेडिकल कलेज भरतपुरबाट ल्याएका थिए ।
उनले पुरानो मेडिकल कलेजबाट ल्याएको एम्बुलेन्सलाई निलो रंगको बनाएर गत १७ गते मोबाइल क्लिनिक भन्दै सञ्चालनमा ल्याएको घोषणा गरेका थिए ।
भारतीय दूतावासले ११ वर्षअघि पुरानो मेडिकल कलेजलाई दिएको एम्बुलेन्सलाई लामिछानेले आफ्नो पार्टीको झण्डाको जस्तै रंग लगाएर प्रयोग गरेका थिए ।
मोबाइल क्लिनिकको उद्घाटन गर्दै सभापति लामिछानेले भनेका थिए, ‘अहिले मैले गर्न लागेको काम यस्तो अपजसी काम हो यो, तर एक चोटी हात त हाल्छु, गाली खाए खान्छु भनेर आएको छु ।’
उनले आफूले सञ्चालनमा ल्याएको मोबाइल क्लिनिक सुरु गरेको केही दिनमै गाडी फिर्ता गरिएको हो ।
