काठमाडौं— घोराही सिमेन्ट इन्डष्ट्रिको आईपीओ आइतबार बाँडफाँड भएको छ।
कम्पनीको शेयर निष्कासन तथा बिक्री प्रबन्धक नबिल इन्भेष्टमेन्ट मर्चेन्ट बैङ्किङको कार्यालयमा दिउँसो आईपीओ बाँडफाँड भएको हो। कम्पनीको आईपीओमा ५ लाख ८१ हजार ५४६ जनाको आवेदन परेको थियो। जसमध्ये २३ हजार ८४५ जनाको आवेदन रद्द भएको छ भने ५ लाख ५७ हजार ७०१ जनाको योग्य आवेदन परेको थियो।
कम्पनीको आईपीओ १० कित्तादेखि ७० कित्तासम्म आवेदन दिएका ५ लाख ५३ हजार ४४ जनालाई माग अनुसार शेयर पाएका छन्। यस्तै ८० देखि ३० हजार कित्तासम्म आवेदन दिएका ४ हजार ६५७ जनालाई ७० कित्ताका दरले शेयर वितरण गरिएको बिक्री प्रबन्धकले बताएको छ।
बाँकी रहेको ६ हजार ९१० कित्ता सेयर ८० देखि ३० हजार कित्तासम्म आवेदन दिएका ४ हजार ६५७ जनालाई पुनः १० कित्ताका दरले वितरण गरिएको छ।
यसअनुसार आवेदकले अधिकतम ८० कित्तासम्म शेयर पाएका छन् । कम्पनीले प्रतिशेयर एक सय रुपैयाँ अंकित मूल्यमा ३३५ रुपैयाँ प्रिमियम थप गरी प्रतिकित्ता ४३५ रुपैयाँका दरले ६९ लाख ११ हजार ६७० कित्ता शेयर सर्वसाधारणका लागि निष्कासन गरेको थियो ।
लगानीकर्ताले बिक्री प्रबन्धकको वेबसाइट र मेरोशेयर एकाउन्टबाट आईपीओको नतिजा हेर्न सक्नेछन्। साथै, कम्पनीको वेबसाइट तथा सीडीएस एन्ड क्लियरिङको वेबसाइट बाट पनि नतिजा हेर्न सकिन्छ।
नतिजा हेर्न यहाँ क्लिक गर्नुहोस् ।
